सध्या अमेरिकेतील कॅलिफोर्निया राज्यात वेगवेगळ्या ठिकाणी जंगलांना आग लागली असून आतापर्यंत 11 लाख एकर जमीन आगीच्या भक्ष्यस्थानी पडली आहे. कॅलिफोर्नियात जंगलांना आग लागणं ही नवीन गोष्ट नाही. मात्र सध्याची आग लागण्यात क्लायमेट चेंज अर्थात जागतिक तापमान वाढीमुळे वातावरणात होणारा बदल जबाबदार असल्याचा अंदाज तज्ञांनी व्यक्त केला आहे.
प्रचंड उष्णता, विजांचा कडकडाट आणि कोरोना संकट यामुळे कॅलिफोर्नियातील आग जास्तच भडकत आहे.
या आगीच्या झळा कॅलिफोर्नियाच्या किनारी भागात देखील पसरल्या असून जगप्रसिद्ध अशा रेडवूड जातीच्या झाडांना धोका निर्माण झाला आहे.
काही दिवसांपूर्वी या राज्यात विजेच्या कडकडाटासह मोठं वादळ आलं होतं. सध्या कॅलिफोर्नियात उन्हाळा चालू आहे. त्यामुळे मोठ्या प्रमाणावर सुकलेले गवत उपलब्ध आहे. जेव्हा वादळ आलं होतं तेव्हा तीन दिवसात 11 हजारांपेक्षा जास्त विजा जमिनीवर कोसळल्या, त्यामुळे अनेक ठिकाणी आग लागली.
कॅलिफोर्निया राज्याला जागतिक तापमानाचे परिणाम जाणवू लागले आहेत. येथील हवामानात स्थिरता राहिली नाही. 2020 मध्ये फेब्रुवारी महिना कॅलिफोर्नियातील लोकांसाठी सगळ्यात जास्त कोरडा ठरला. त्यानंतर राज्याच्या उत्तर आणि पूर्वेकडच्या भागात उष्णतेच्या लाटा आल्या. त्या भागाचे तापमान सतत वाढत असल्याने राज्यातील जंगलं, गवताळ प्रदेश सुकू लागली आहेत.
कॅलिफोर्नियातील डेथ व्हॅले नॅशनल पार्क येथे 54.4 डिग्री सेल्सिअस तापमानाची नोंद घेण्यात आली. हे तापमान पृथ्वीवरील आतापर्यंतच सर्वात जास्त तापमान आहे.
खरंतर कॅलिफोर्नियात जंगलांना आग लागणं नवीन गोष्ट नाही. उलट आग लागल्यानंतर त्याच्या राखेतून वेगवेगळी पोषक तत्व झाडांना मिळत असतात. त्यामुळे जंगलांना आग लागणं हा येथील पर्यावरण संस्थेचा भाग आहे. मात्र यावर्षीच्या आगीत ज्या ठिकाणी सहसा आग लागत नाही, अशा ठिकाणी देखील ही आग पसरली आहे.
या संकटामुळे 18 ऑगस्टला कॅलिफोर्नियात आपत्कालीन परिस्थिती जाहीर करण्यात आली. सध्या या राज्यात कडक उन्हाळा आहे आणि तापमान देखील नेहमीपेक्षा जास्त आहे. त्यामुळे देखील आग वाढत आहे. त्याचबरोबर वीज पडल्याने देखील वेगवेगळ्या ठिकाणी आग लागत आहे.
आग आटोक्यात आणण्यासाठी शर्थीचे प्रयत्न चालू असून सध्याच्या परिस्थितीला अग्निशामन दलाचे बारा हजार कर्मचारी आग विझवण्यासाठीचे प्रयत्न करत आहेत.