भारताचे माजी राष्ट्रपती प्रणव मुखर्जी यांनी वयाच्या ८४ वर्षी अखेरचा श्वास घेतला. दिल्लीतील रिसर्च अॅण्ड रेफरल रुग्णालयात उपचारादरम्यान त्यांचे निधन झाले. प्रणव मुखर्जी यांचे पुत्र अभिजीत मुखर्जी यांनी ट्विटद्वारे ही बातमी दिली. गेल्या १० दिवसांपासून प्रणव मुखर्जी यांच्यावर उपचार सुरु होते.
With a Heavy Heart , this is to inform you that my father Shri #PranabMukherjee has just passed away inspite of the best efforts of Doctors of RR Hospital & prayers ,duas & prarthanas from people throughout India !
I thank all of You ?— Abhijit Mukherjee (@ABHIJIT_LS) August 31, 2020
१० ऑगस्ट रोजी प्रणव मुखर्जी यांची प्रकृती बिघडली होती. त्यांच्या मेंदूत असलेल्या गाठीवर शस्त्रक्रिया देखील करण्यात आली होती. दरम्यान एक दिवस आधी त्यांची कोरोना चाचणी पॉझिटिव्ह आली होती. यानंतर त्यांना व्हेंटिलेटरवर ठेवण्यात आलं होतं. रुग्णालयात दाखल झाल्यापासून त्यांच्या प्रकृतीत कसलीच सुधारणा दिसून येत नव्हती. त्यानंतर ते कोमात गेले असल्याचे रुग्णालयाकडून सांगण्यात आलं होत.
आज सकाळी रुग्णालयाने मेडिकल बुलेटिन प्रसिद्ध करत फुफ्फुसांच्या संसर्गामुळे मुखर्जी सेप्टिक शॉकमध्ये गेले असल्याची माहिती दिली होती. पण अखेर उपचारादरम्यान त्यांनी अखेरचा श्वास घेतला.
प्रणव मुखर्जी भारताचे १३ वे राष्ट्रपती होते. राष्ट्रीय राजकारणात ते १९६९ पासून सक्रिय कामगिरी करत होते. तर भारतीय राजकारणातील अमूल्य सेवेसाठी मुखर्जी यांना २००८ मध्ये पद्मविभूषण पुरस्काराने सन्मानित करण्यात आले होते. तर ८ ऑगस्ट २०१९ रोजी त्यांना राष्ट्रपती रामनाथ कोविंद यांच्या हस्ते भारतरत्न पुरस्कार प्रदान करण्यात आला होता.
