पृथ्वीच्या आजूबाजूने सतत लहान मोठ्या आकाराचे लघुग्रह जात असतात. या लघुग्रहांवर नजर ठेवण्याचे काम नासा ही अमेरिकेतील अंतराळ संशोधन संस्था करत असते. सध्या नासा अशाच एका लघुग्रहावर नजर ठेवून असून त्याचा आकार इजिप्तमधील गिझा पिरॅमिडच्या दुप्पट आहे. नासाने दिलेल्या माहितीनुसार हा लघुग्रह 6 सप्टेंबरला भारतीय वेळेनुसार दुपारी 3.30 वाजता पृथ्वीच्या कक्षेत प्रवेश करेल.
465824 (2010 FR) असं नाव असलेल्या या लघुग्रहाचा समावेश अपोलो लघुग्रह या प्रकारात होतो. कारण हा लघुग्रह पृथ्वीच्या कक्षेत प्रवेश करणार आहे. या लघुग्रहाला 2010 मध्ये पहिल्यांदा खगोलशास्त्रज्ञांनी शोधलं होतं.
ताशी 50,000 किलोमीटर एवढा वेग असणाऱ्या या लघुग्रहाला नासाकडून नियर अर्थ ऑब्जेक्ट NEO असा दर्जा मिळाला आहे. जे लघुग्रह पृथ्वीच्या खूप जवळून जातात किंवा त्यांचा धोका पृथ्वीला होऊ शकतो अशा लघुग्रहांना नियर अर्थ ऑब्जेक्ट म्हटलं जातं.
‘लघुग्रहाचा कोणताही धोका नाही’
नासाने ट्वीट करून या लघुग्रहाचा कोणताही धोका पृथ्वीला नसल्याचं सांगितलं आहे. चंद्रापेक्षा 19 पटीने जास्त अंतरावरून हा लघुग्रह जाईल.
सेंटर फॉर नियर अर्थ ऑब्जेक्ट स्टडीजच्या शास्त्रज्ञांनी सांगितलं आहे की अनेक प्रकारचे लघुग्रह पृथ्वीच्या शेजारून जात असतात. त्यांचा पृथ्वीला फारसा धोका नसतो. त्याचप्रमाणे या लघुग्रहाचा कोणताही धोका पृथ्वीला नाही.
अपोलो लघुग्रहाचं पृथ्वीपासूनचं अंतर साधारण 14 कोटी 95 लाख किलोमीटर इतकं आहे. पृथ्वी आणि लघुग्रहात असलेलं हे अंतर जास्त असल्याने त्याचा पृथ्वीला धोका नाही. मात्र इतर ग्रहांच्या गुरुत्वाकर्षणामुळे लघुग्रहाच्या कक्षेत बदल होऊ शकतो.पण याची शक्यता खूप कमी असते.