‘द लँसेट’ या वैद्यकीय नियतकालिकात प्रसिद्ध झालेल्या संशोधन अहवालात कोरोना विषाणूंवर रशियाने विकसित केलेल्या स्पुटनिक लसीमुळे रुग्णांमध्ये प्रतिकार शक्ती निर्माण होत असल्याचे म्हणले आहे. स्पुटनिक या लसीच्या पहिल्या व दुसऱ्या चाचणीत कोरोनाबाधित रुग्णांच्या शरीरात प्रतिकारक शक्ती निर्माण झाली असे देखील लँसेटच्या अहवालात नमूद केले आहे.
क्लिनिकल चाचणीसाठी जेवढ्या कोरोनाबाधित रुग्णांवर स्पुटनिक या लसीचा प्रयोग करण्यात आला त्या रुग्णांना फक्त ताप आला तोही सौम्य होता. पण रुग्णांमध्ये प्रतिकार शक्ती निर्माण झाली. यामुळे रुग्णांच्या प्रकृतीवर कोणताही विपरीत परिणाम झालेला नाही.
गेल्या सहा महिन्यांपासून रशियाने कोरोनावर लस विकसित करण्याचे प्रयत्न सुरू केले होते. रशियाचे अध्यक्ष व्लादिमीर पुतीन यांनी स्पुटनिक व्हीची दुसरी चाचणी यशस्वी झाल्याचा देखील दावा केला होता. तर त्यांनी आपल्या मुलीवर या लसीचा प्रयोग केला होता. यावर सुद्धा लसीचा सकारात्मक परिणाम होत असल्याचे जाहीर केले होते.
स्पुटनिक व्ही लस
स्पुटनिक व्ही लसीची जेवढ्या रुग्णांवर चाचणी घेतली त्यातील अर्ध्या रुग्णांना ताप आला. यात ४२ टक्के रुग्णांना डोकेदुखी तर यातील २८ टक्के रुग्णांना अशक्तपणा व २४ टक्के रुग्णांना सांधेदुखी जाणवली.
लसीचे दुष्परिणाम किती काळ राहतात यावर माहिती नाही पण जे परिणाम रुग्णांना जाणवले ते अत्यंत सौम्य होते, असे लॅन्सेटच्या अहवालात सांगितले आहे. सध्या मॉस्कोतील गामेल्या ‘राष्ट्रीय संशोधन केंद्रात’ या लसीवर प्रयोग चालू आहेत. तर २८ ऑगस्टपासून ४० हजार रुग्णांवर या लशीची तिसऱ्या टप्प्यातील चाचणी सुरू करण्यात आली आहे.
