जगभरात कोरोनाचा फैलाव करण्याचा आरोप असणाऱ्या चीनने कोरोना विषाणूची पहिली लस सोमवारी जगासमोर सादर केली आहे. ही लस बीजिंग ट्रेड फेअरमध्ये प्रदर्शित करण्यात आली. या लसीचा जगातील त्या १० लसींमध्ये समावेश आहे ज्या आपल्या क्लिनिकल ट्रायलच्या शेवटच्या टप्प्यात आहेत.
चीनची ही लस सिनोवेक बायोटेक आणि सिनोफॉर्म या कंपन्यानी संयुक्तपणे तयार केली आहे. चीनच्या राष्ट्रीय आरोग्य आयोगाने शनिवारी लसीबाबत खुलासा करताना सांगितलं होते की, ते २२ जुलैपासूनच आपल्या नागरिकांना या लसीचा डोस देत आहेत.
चीनची लस वर्षाच्या शेवटी येणार असून सध्या लसीची तिसऱ्या टप्प्यातील चाचणी सुरू आहे. लसी संदर्भात बोलताना सिनोवेक कंपनीच्या अधिकाऱ्यांनी “आमच्या कंपनीने सुरुवातीपासूनच ही लस तयार करण्यासाठी एक फॅक्टरी तयार केली आहे. या फॅक्टरीत दरवर्षी लसीचे ३०० मिलियन डोस बनवण्याची क्षमता असल्याचे म्हणले आहे.
सध्या जगभरातून कोरोना लसीची मागणी केली जात आहे. त्यामुळे ज्यावेळी कोणतीही लस यशस्वी होईल, त्या लसीलाच पहिल्यांदा मान्यता देण्यात येणार आहे.