देशात शनिवार पासून करोना प्रतिबंधक लसीकरण करण्यात येणार आहे. या मोहिमेचे उद्घाटन पंतप्रधान नरेंद्र मोदी यांच्या हस्ते करण्यात येणार आहे.शनिवारी सुरू होणाऱ्या लसीकरणासंबंधी अगोदरच केंद्र सरकारने राज्यांना नियमावली पाठवली आहे. या नियमावलीनुसार आरोग्य क्षेत्रातील जवळपास तीन कोटी कर्मचाऱ्यांना २९३४ केंद्रांवर लस टोचण्यात येणार असून एका केंद्रावर दररोज एका सत्रात १०० जणांचे लसीकरण करण्याची सूचना राज्यांना दिली आहे.
तसेच ज्यांना कोरोनाची लागण झाली होती त्यासाठी प्रोटोकॉल पाळावे लागणार आहेत. करोनाची लक्षणं असणाऱ्यांचं, प्लाझ्मा थेरपी झालेल्यांचं तसंच इतर कारणांमुळे रुग्णालयात दाखल असणाऱ्यांचं लसीकरण चार ते आठ आठवड्यांसाठी स्थगित करावं लागणार आहे.
तर यावेळी लसीची अदलाबदल केली जाऊ नये असं केंद्र सरकारने स्पष्ट सांगितलं आहे. पहिला डोस ज्या लसीचा देण्यात आला होता त्याच लसीचा डोस दुसऱ्या वेळी दिला जावा असं केंद्राने स्पष्ट बजावले आहे.
या नियमावलीत लसीकरणादरम्यान काही मात्रा वाया जाण्याची शक्यता गृहीत धरून प्रति १०० कुप्यांमागे दहा कुप्या राखीव ठेवण्यात सांगितले आहे. या लसीकरणासाठी वयोमर्यादा आखण्यात आलेली असून १८ पेक्षा जास्त वय असलेल्यांनाच यामध्ये सहभागी करुन घेता येणार आहे. यासोबत गरोदर माता किंवा ज्यांना गरोदरपणाबद्दल नक्की माहिती नाही, स्तनपान करणाऱ्या मातांचं लसीकरण न करण्याची परवानगी केंद्राने दिली आहे.
