मागील काही महिन्यांपासून सोशल मीडियावर बॉलीवूडला मोठ्या प्रमाणात विरोध होताना दिसत आहे. नुकताच प्रदर्शित झालेल्या लाल सिंग चढ्ढा चित्रपटावेळी सोशल मीडियावर मोठ्या प्रमाणावर टिका झाली होती.
यानंतर ९ सप्टेंबरला येणाऱ्या ब्रह्मास्त्र चित्रपटा विरोधात ट्रोलर्सकडून #BoycottBrahamstra मोहिम सुरु आहे. या धर्तीवर सोशल मीडियावर शाहरुख खानबाबत एक पोस्ट फिरत आहे.
यात असा दावा करण्यात आला आहे की, Boycott ट्रेंडला घाबरून शाहरुखने आपल्या पठाण चित्रपटाचे नाव बदलून जवान असं केलं आहे. हा मेसेज फेसबूक आणि ट्विटरवर व्हायरल होत आहे.
Fact Check
शाहरूख खानचे २०२३ वर्षात २ चित्रपट प्रदर्शित होणार आहे. शाहरूखने आपल्या अधिकृत इन्स्टा हॅंडलवर याबाबत माहिती दिली आहे. यातील पठाण चित्रपट 25 जानेवारी 2023 रोजी प्रदर्शित होणार असून यात शाहरुख खान सोबत दीपिका पदुकोण आणि जॉन अब्राहम प्रमुख भूमिकेत आहेत. चित्रपटाचे पोस्टर 25 ऑगस्ट रोजी खानच्या इंस्टाग्राम हँडलवर पोस्ट करण्यात आले आहे.
तर जवान हा चित्रपट 2 जून 2023 रोजी रिलीज होणार आहे. या चित्रपटाचे दिग्दर्शन ऍटली यांनी केले आहे आणि त्यात खानची भूमिका आहे. याबाबत शाहरूखने ४ जून रोजी पोस्ट केली आहे.
यामुळे जवान आणि पठाण हे दोन वेगवेगळे चित्रपट असून शाहरुखने ‘पठाण’ चित्रपटाने नाव बदलून ‘जवान’ ठेवल्याचा दावा पुर्णपणे खोटा आहे.